احمد شعيب
قالو غبت يا شعيب سبع ثمان سنين                إسمك بجو الشعر مـا عاد لو رنين
جاوبتهم والقلب عم يخفق حنيـــــن            بقصة غيابــي لا تكونــــوا ظالمين 
بغيبة خليل الشعر كثرو اللامعيــن            وسامع بنــاس بحالهم مش سامعين
ولولا انا غيب ويطـــــــول الغياب            ما في طليع ولا حدى من الطالعين 

طليع حمدان
طلعة طليع اللي الفجـــر منها أقتـدى          بتتوحـم عليها مشـــاعيل الهـــدى
ولما جنابك عا حِمـــى الغربه أهتدى         عا غيبتك لبنان ما ضيَّــــع صدى
ولما برجوعك البلبل الشـــادي شدى            لقيناك يـــابس لا زهــور ولا ندى
وبالرغم ما رجعت بسلامه ع البلاد                 بتنعدّ بعدك غــايب وما في حدى

أحمد شعيب
يا ناكر زهوري وشذى معروفهــــــــا         ورهجة قوافي در صافي حروفها
لا تزيحنا بطلعه غريبه ظروفهـــــــــا         وقبل الحكي عن سترها ومكشوفها 
أسال الجماهير وزقيف كفوفهــــــــــا          وشعّارنــــا وقلامهـــا ودفوفهـــــا

غيابي غياب الشمس ورجوعي كمان         رجوع الشمس ع شرط إنت تشوفها

طليع حمدان
بيعد بأفكارك معـــــــي يـــا عندليب         حتى بروجعك عطر عجناحك تجيب
شمس الوجود من الدني لما تغيـــب         بترسم عشاطئ البحر مبسمها الكئيب
وإنت يا شمس الدلع وال "ميني جيب"      زهق ربي من  شـــــروقك والمغيب
كل ما طلع تا شوفك بالسمــــــــــا           ما بشـوفــــك غير عالشاطئ القريب

احمد شعيب
بهنيك يا معود لســــــــانك عالهجـــا         بال"ميني جيب" بيخجلو حروف الهجا
دوخ عيونك بالمواهب والحجــــــــا          نــور العقل بشيب عيــــــون الدجـــــا
لما لقيت البعد مـــــا منو رجـــــــــا          عاد الطموح لأقرب مسافـــــه التجـــا
وفضلت حالي ضل عالشاطئ قريب        تا كون همزة وصل وسفينــــة نجـــــا

طليع حمدان
بين البعد والقرب يا أصحاب العقول               شوفو الطريقو طلوع والدربو نزول
همزة وصل عن حالك بتقدر تقــول                 وبيناتنا والمجد ممنــوع الوصــــول 
ان كنّك سفينة نجــا بهالبحر جــول                 أبعد مع الموجات وتحـدى الفصول
لكن إذا بتضل عالشاطــــئ الامين                  بلقبوك النـــاس بسفينـــة خمـــــول

احمد شعيب
النحلــه قدر مــــا غيرت عدانهــــا                 بتعود ترجع للقفيــــر ال صـــانها
والسفينــــة المشيت والله عــــــانها                 عم تنقل الغيــــــاب عا أوطـــانها
وفي إم لوعها الزمــــان وخـــانها                   وهجر الأبن فجر بحـــر أحزانها 
وضلت حزينه وباكيه طول الحياة                  تاعاد ليهــا وأرتمى بأحضـــانها

طليع حمدان
قرب الحنونه غصن والطفله ثمر                      وبعد المربــي شاهد وعبا الكمـر
ويا مأمن بريشــــــه قريبه للوتر                 أبعد لا تقرب صار قربك محتقـر
وحتى تصير تأمــــن ببعد النظر                 من بعد هاك العز وليالي السمــر
شوف القمر بالجو صغرت قيمتو                بوصول "أبولو" على سطح القمر

 
احمد شعيب
عقد ما تشوف البعد غامض رهيب              ما في طريق بعيد عالواعي اللبيب
يللي قصد تيكشف السر الرهيــــب               يمكن يصيب بنظرتو يمكن يخيب
خذلك بيــــــان عليك وعليي قريب               وعا كل قلب ملوع ومـا لو طبيب
بعد الحبيب ولوع ودمـــــوع وشقا               أحلى سعاده بهالدني قرب الحبيب

طليع حمدان
إبعدلي حبيبي بعيد عني منزلــــو                 حتى يضلو خيــــوط قلبــي يغزلو
وان كنت ســــر العاشقين بتجهلو                 من واجباتك للمجـــرب تسألــــــو
لما الحبيب يشنكلك وتشنكلـــــــو                 بتبيعدو المشـــوار حتى تطولـــــو
كل ما حبيبك يبعدك عن منزلــو                  كل ما بصدرك هتف قلبك إلــــــو
وبتصير لو شفت البلابل ترغلو                  تصرخ حبيبي مبسمك ما أجملــــو
ولما العسل بظل عثمك قريـــب                  بتموت فيك ال قابليـــــه للحلــــــو
أحمد شعيب
ظنيت رح يطلع طليع بشــــي جديد              تاري جديدو مثل رحمه ع الفقيد
ال بحب وبيعشق عطرزك من بعيد              رح يطلع معثر بحبـو شئ أكيد